Jornalista Timor Post, iha edisaun Tersa, 18 Junho 2013, "hakfodak" wainhira apanha dezenhu ba Estadiu foun nebe SEJD prepara hela atu hari.
Tuir Jornal Timor Post, jornalista rasik, hatun notisia ne’e ho titulu curioso “Ita Nia Estadiu Luxu”, no relata hikas nia vizita “derepente” ba fatin SEJD nian.
La hein, jornalista ne’e "hakfodak" hare iha sala Bainaka nian, iha meja leten, “tidin” hela dezenhu uma estadiu ida ho multifunsaun. Ho curiosidade, jornalista TP ne’e la fo-liu biban aproveita dadalia ho staff SEJD nian ida hodi husu konaba dezenhu ne’e. Staff ne’e haktuir katak “estadiu ne’e nia kapasidade bele hatama ema to’o 8000 ou 9000. Modelu Tornado no iha kakuluk beke taka loke iha tempu udan no loron.”
Konaba ninia implementasaun, staff ne’e apenas konta tuir deit katak “iha semana ne’e SEJD ho instituisaun relevantes halo enkontru fila fila ona, no falta enkontru ikus koalia kestaun tekniku, no tuir mai sei loke konkursu nudar projetu ho standart internacional.
Iha edisaun ne’e, jornal TP informa konaba Instituisaun Futebol no orgaun sira seluk nebe mak durante ne’e hateke ba Timor Leste ho matan sorin deit tambá deit ita nia kondisaun (Estadiu Municipal Dili) la prense kriteriu minimu. Tamba, de facto, tuir TP, foin lalais ne’e orgaun futebol sudeste aziatiku ASEAN Football Federation (AFF) nian observa hela Timor Leste atu sai uma-nain ba Tasa AFF sub 19, hateten katak “estadiu municipal laiha kondisaun nem prense kriteriu standar minimu.
“Afinal Governu Timor Leste la toba dukur” (para não dizer “toba la dukur”), nune’e ho admirasaun jornalista ramata nia artigu.
Publiku ho serteja haksolok ho informasaun “derepente” ka “hakfodak” ne’e maibe ho reserva konaba nia realizasaun, Etadiu Luxu.
Nudar timoroan ita haksolok ho optimismu ba projetu ne'e, tamba, independentemente ho kumprimisu nasional (designiu nasional), ba Tebe Bola nian, Timor Leste prepara hela atu hahu Liga Nasional Futebol (Pra Liga), atu nune'e bele hadi'ak ita Selesaun hodi tuir turnamen no kampeonatu iha nivel internasional.
Ita hein!
Fonte ba hakerek artigu ne'e foti hosi Timor Post (www.diariutimorpost.tl). Edisaun Tersa, 18 Junho 2013 - sporTimor
